නැවතත් අගමැති ලෙස රනිල් දිවුරුම් දෙයි

එක්සත් ජාතික පක්ෂයේ නායක රනිල් වික්‍රමසිංහ මහතා මීට ටික වේලාවකට පෙර ශ්‍රී ලංකාවේ අග්‍රමාත්‍යවරයා ලෙස ජනාධිපති මෛත්‍රීපාල සිරිසේන මහතා ඉදිරියේ දිවුරුම් දුන්නේය.

වික්‍රමසිංහ මහතා අග්‍රාමාත්‍යවරයකු ලෙස ජනාධිපතිවරයකු ඉදිරියේ දිවුරුම් දුන්නේ පස් වැනි වතාවටය.

1993 මැයි 07 වැනි දා මුලින්ම ඔහු අග්‍රමාත්‍යවරයා ලෙස දිවුරුම් දුන්නේ ඩී බී විජේතුංග ජනාධිපතිවරයා ඉදිරියේය. ඔහුගේ එම ධුර කාලය චන්ද්‍රිකා බණ්ඩාරනායක කුමාරතුංග මහත්මිය අග්‍රාමාත්‍යවරිය ලෙස පත් වීමත් සමඟ 1994 අගෝස්තු 19 වැනි දා අවසන් විය.

යළිත් වරක් 2001 දෙසැම්බර් 09 වැනි දා චන්ද්‍රිකා බණ්ඩාරනායක කුමාරතුංග ජනාධිපතිවරිය ඉදිරියේ දිවුරුම් දුන් ඒ මහතාගේ දෙවැනි ධුර කාලය අවසන් වූයේ 2004 අප්‍රේල් දෙවැනි දා ය.

2015 ජනවාරි අට වැනි දා පැවැති ජනාධිපතිවරණයෙන් පසු 2015 ජනවාරි නම වැනි දා රනිල් වික්‍රමසිංහ මහත් තුන් වැනි වතාවට අගමැති ලෙස දිවුරුම් දුන් අතර එම ධුර කාලය 2015 අගෝස්තු 21 වැනිදායින් පසු අවසන් විය.

2015 අගෝස්තු 17 වැනි දා පැවැති මහ මැතිවරණයෙන් ජයග්‍රහණය කළ රනිල් වික්‍රමසිංහ මහතා සිව් වැනි වතාවට අගමැති ලෙස දිවුරුම් දුන්නේ 2015 අගෝස්තු 24 වැනි දා ය. 2018 ඔක්තෝබර් 26 වැනි දා අති විශේෂ ගැසට් පත්‍රයක් මගින් ජනාධිපතිවරයා විසින් වික්‍රමසිංහ මහතා අගමැති ධුරයෙන් ඉවත් කරනු ලැබෙන තෙක් ඔහු එම ධුරයෙන් කටයුතු කළේය.

ඔක්තෝබර් 26 වැනි දා ඉවත් කිරීම නීතිවිරෝධී හා ව්‍යවස්ථා විරෝධී බව කියමින් මේ වන විට එය ශ්‍රේෂ්ඨාධිකරණය හමුවේ අභියෝගයට ලක් කර ඇති අතර ඊට අදාළ මූලික අයිතිවාසිකම් නඩු දෙකක් ලබන වසරේ ජනවාරි මාසයේ දී කැඳවීමට නියමිතය.

Leave a Reply

Your email address will not be published. Required fields are marked *