නිර් මාණකරුවන් විදිහට පවතින සමාජ ස්වභාවය කියවිය යුතුයි – මංජු නැඳගමුව

මංජූ නැදගමුව අපි දන්නේ කවියෙක් ලෙස මොකද්ද මේ අලුත් ආගමනය.

ඔව්. ඇත්තටම කවියෙක් ලෙස මාව ඔබ හැදින්වුවත් මම හිතන්නෙ මම තාම කවියෙක් නෙමේ කියලයි. මොකද ඒ යම් හැදෑරීමක් කළ යුතු වෙනවා. මම තවම ඒ හැදෑරීම කරන ආධුනිකයෙක් කිව්වොත් නිවැරදියි. කෙසේ වෙතත් 2016 මම කාව්‍ය සංග්‍රහයක් නිකුත් කළා.ඉන් පසු 2019. මේ වසරේ කෙටි කතා සංග්‍රහයක් නිකුත්, කළත් 2017 වසරේ මම “මග දිග කතා “ නමින් ලුහුඩු කතා එකතුවත් නිකුත් කළා ඉතිං මේ කවියෙන් පටන් ගත් ගමනෙ
තවත් එක් සංදිස්ථානයක් කියල මම හිතනවා.

සාහිත්‍ය වේදීන්ගේ ගමන ක්‍රමික වූවක් පළමුව කවි දෙවැනුව කෙටි කතා තෙවනුව නව කතා ඔබත් මේ ගමන මෙසේ යන්නෙක්ද ?

බොහෝ නිර්මාණකරුවන්ගේ නිර්මාණ ගමන පිළිබඳව විමසීමේදී කවිය, කෙටිකතාව, නවකතාව පිළිවෙලින් ආ වග පෙන්නුම් කරනව. ඒකෙ වරදක් මම දකින්නෙ නෑ. මම ගැන කතා ක⁣ළොත් මම කවියට කලින් ස්පර්ශ කලේ ගීපද රචනාවයි. මගේ පදමාලාවක් ගීතයක් ලෙස පටිගත වෙන්නෙ 2002 වස⁣රේ.ඉන් පසුය තමයි මම කවියට එන්නෙ. ඒ ආ ගමනේ අද කෙටිකතාව ළඟ නැවතී සිටිනවා. ඉදිරියේ දී නවකතා ශානරයත් තොරාගන්නවා.

කෙටි කතා සංග්‍රහය ඔබ නම් කර ඇත්තේ ඒ මිනිහා නමින් පාඨකයාට කියවීමට ඉඩ තබා අපි සමස්ත කෙටි කතා සංග්‍රහය ගැන කතා කලොත්

ඔව්, ඒ මිනිහා නමින් නම් කර ඇති මගේ පළමු කෙටිකතා එකතුවේ කෙටිකතා එකොළහක් ඇතුළත් වෙනවා. ඉන් කීපයක් මුහුණු පොත මගින් මම පළකළ කතා. බහුතරයක් කතා කවුරුත් කියවා නැති කතා . අපේ සමාජයේ විවිධ චරිත ස්වභාවයන් ගැන මම දකින විඳින අත්දැකීම් එකතුවක් ලෙස ⁣ඒ මිනිහා නිර්මාණය වී නිම වුණා කිව්වොත් නිවැරදියි.

මංජු සාහිත්‍ය ක්ෂේත්‍රයේ ප්‍රසිද්ධ නිහතමානී උදව් කරන්නෙක් විදියට. ඔබට ඔබ ගැන මෙහිදි දැනෙන දේ කිව්වොත්

ඒ හැදින්වීම පිළිබඳව නිමතමානීව සතුටු වන අතර ඔබට ස්තුතිවන්ත වෙනවා. මෙහෙමයි මුහුණු පොත හරහා තමයි ඒ සියල්ල සිදුවන්නේ. ඔබ පවසන අයුරින් උදව් කරනවා කියන්නේ මම තවත් නිර්මාණකරුවන් දිරිගන්වමින් ඔවුන් ගැන හා ඔවුන්ගේ නිර්මාණ ගැන ලියන එක වෙන්න ඕනෙ. ඇත්තටම මම ක්ෂේත්‍රයට එද්දි මම ගැන කවුරුත් දැනගෙන හිටියෙ නෑ. මුහූණු පොතේ එවකට සිටි යහළුවන් 350 ක් පමණයි. මට මතකයි මගේ පළමු නිර්මාණ එකතුව නිකුත් කරන පනිවුඩය මගේ එක්තරා යෙහෙළියක ඇගේ බිතේ පළ කළා කියා ඇගේ යෙහෙළියක් උරණ වූ සිද්ධියක්. එහෙමයි මම පටන් ගත්තෙ මේ ගමන. ඒ එදා මම විඳි අත්දැකීම නිසාම මම එදා පටන්ම ආධුනික ප්‍රවීණ සියළුම දෙනා ගැන ලියන්න පටන් ගත්තා. මම හිතන්නෙ දාහකට වැඩි පිරිසක් ගැන මම දැනට ලියල තියෙනව. ඒ ගැන සතුටුයි. අර මගේ කව් පොත ගැන සටහනක් ලිව්වාට මගෙ මිතුරිය සමඟ උරණ වූ කෙනා ගැනත් මම ලිව්වා ඒව අමතක කරලා.

 මේ ප්‍රශ්නයට ඔබ ප්‍රශස්ත පිළිතුරක් දෙන බවට විශ්වාස නිසාම මෙහෙම අහන්නම්..
පසුගිය දෙවසරක් තුළ අපි වසන්ගත තත්වයකට මුහුණ දුන්නා මුළු ලෝකයම ඒ එක්කම මිනිස් සබඳතාවයන් අතිශය පටු වුනා. නැතිනම් මානව ප්‍රජාවේ වර්ධනීය අවකාශයන් වසර දෙකකින් අත්හිටවනු ලැබූවා මේ අතර තුර කාලය මෙතෙක් අපි විදි කාලයට හා වසන්ගතයෙන් පසු කාලය සදහා නිර්මාණය කිරීමේදී වෙනස්ව මේ සමාජය කියවා ගත යුතු නේද ?

ඇත්තටම පසුගිය වසර දෙක තුනක කාලයක් වසන්ගත තත්ත්වය හමුවේ සහ ඉන් පසු රටේ පැවති දේශපාලන අර්බූද හමුවේ අපට අහිමි වුණා කිව්වොත් නිවැරදියි. නව නිර්මාණයකට යොමුවීමට තිබුණු ඉඩ කඩ වසන්ගතයෙන් ආරක්ෂා වීමටත් , ඉන්පසු සහ මෙි දක්වා අත්විඳින දැඩි අපහසුතාවයන් සමඟ අපිට ඇහිරී ගොස් තියෙනවා. මේ සමාජ හානිය හමුවේ නිර්මාණකරුවෙකු අත්විඳින මේ කටුක, වේදනාකාරි අත්දැකීම් පවා ඔවුන්ගේ නිර්මාණ වලට වස්තුබීජ සපයනව. ඒ නිර්මාණයන් ඔවුන් වගේම හුදකලා වු වෙලාවක් අපි මේ ගෙවා දමමින් ඉන්නේ. සමස්ථ සාහිත්‍යයම අඩපන වෙලා කීවොත් නිවැරදියි. මිනිස්සු පොත පතින් ඈත්වෙලා. දරුවන් අමතර පොත පත කියවන එක නවත්තලා. පාඨකයාට දරාගන්න බැරි පිරිවැයක් දරන්න වෙලා තියෙනව අද කියවීමේ රුචිය වෙනුවෙන්. සෑම පුවත්පතකම පාහේ පළවූ සාහිත්‍ය අතිරේකවල ඉඩකඩ සීමාවෙලා. සමහර පුවත් පත් සාහිත්‍ය අතිරේක නවත්තලා. කවි පිටු, පිටු භාගයක් වෙලා. මේ අවාසනාවන්ත කාරණාවල අයහපත් ප්‍රතිඵල ඉදිරියේ දී සමස්ථ සමාජයටම අඩු නැතුව දැනෙයි. අන්න ඒ පසුබිමක සිට තමයි ඔය ඇසූ පැනයට පිළිතුරක් දෙන්න වෙන්නෙ. ඇත්තටම නිර්මාණකරුවන් විදිහට පවතින සමාජ ස්වභාවය කියවිය යුතුයි. එවන් කියවීමකින් පසු වුවද නිර්මාණ කිරීමේ අභියෝගය බරපතලව දැනෙනව.මොකද සාහිත්‍ය කන්න දැයි විමසූ දේශපාලන මුණූ අදටත් හිස ඔසවමින් හිඳින නිසා .

 අපි අත්විදි සමාජ ක්‍රමය දැන් නෑ .. දශකයකින් පැරණී ලෝකය අලුත් වෙනවා නම් මේ ලියන කෘති තුළ අඩංගුව කොපමණ දුරට අලුත් ලෝකය උකහා ගනීද ?

මෙහෙමයි වෙනස් වන සමාජ ක්‍රමයත් එක්ක නිර්මාණ පමණක්ම නොවෙයි බොහෝ දේ වෙනස් වෙනවා. ගම්පෙරළිය නවකතාව පහුකරගෙන අපේ නවකතාකරුවන් ඇවිත් තියෙනවා. නමුත් ගම්පෙරළියත් තවම කියවන අයත් ඉන්නව. ඒක සාපේක්ෂයි . දැන් අලුතෙන් ලියන පරම්පරාවක් හැදෙමින් ඉන්නව අපට දකින්න ලැබෙනවා. ඒ අයගේ නිර්මාණ හැකියාවන් ඉතාම ඉහළ මට්ටමක තියෙනව. ඒක නිසා අද අප එළිදක්වන නිර්මාණ ඒ හේතුව නිසා ඉවත් වෙනවා කියන තැන මම ඉන්නෙ නෑ. මම මුලින් සඳහන් ක⁣ළෙත් ඒකයි.අලුත් නිර්මාණ බිහිවෙයි. එහෙත් පාඨක හිත් වැළඳගත් නිර්මාණ ඒ ඒ හදවත්වල සදාකාලිකවම තැන්පත් වෙලා තියෙයි.

මංජු සාහිත්‍ය කරණය අත පොත් තබන්නේ කොහොමද

මම සාහිත්‍යයට අත් පොත් තබන්නේ පාසල් කාලයේදීමයි. එවකට අපි එකතුවෙලා සාහිත්‍ය සංග්‍රහයක් කියල නිර්මාණ එකතුවක් කළා. ඒ අපොස සාමාන්‍ය පෙළ කාලෙදි. ඉන් පසුත් උසස් අධ්‍යාපනයට යොමු වුනාට පසුත් යම් යම් කවි, ගීත, කෙටිකතා රචනා කරමින් උන්නා. ඒ ආභාෂය මට උපතින් ආ දෙයක් කියලයි මම විශ්වාස කරන්නෙ.

කලාව ජනතාව උදෙසා යන මතයේ ඔබ ඉන්නවද ? එසේ නම් වර්තමානයෙ කලාව ජනතා සේවය සදහා කොපමණ කැපවී තිබේද ?

කලාව ජනතාව උදෙසාය කියන මතයේ මම ඉන්නව. මොකද අපි මේ නිර්මාණකරනයේ යෙදෙන්නෙ කා වෙනුවෙන්ද?. අපේ නිර්මාණ ජනතාව රස නොවිඳින්නේ නම් ඒවා පවතින්නේ කොතැනකද? හැබැයි මෙහෙම දෙයකුත් තියෙනවා. පිරිසක් අවංකවම ජනතාව වෙනුවෙන් තම නිර්මාණ කරන බවත් තවත් පිරිසක් ලාභ ප්‍රයෝජන සම්මාන සඳහා නිර්මාණ කරන බවත් පේනවා. ඒක ඉතිං සමාජයේ සාමාන්‍ය දෙයක්. හැම දේකම හොඳ නරක කියා දෙකක් දෙපිරිසක් ඉන්න නිසා සාහිත්‍ය නිර්මාණකරනයේ දීත් ඒක එහෙම වෙන්න පුළුවන්.

අපිට ඒ මිනිහා ගේ පාඨක ප්‍රවිශ්ටය ගැන කිව්වොත්

ඒ මිනිහාගේ පාඨක ප්‍රවිශ්ටය ගැන දැන්ම අදහසක් ප්‍රකාශ කරන්න අපහසුයි. මුද්‍රණ කර්මාන්තයේ අර්බුද රැසක් හමුවේ ඒ මිනිහා දොරට වඩින්නේ වසර හතරක වෑයමකින් පස්සෙ. මම හිතනවා මගෙ අනෙක් නිර්මාණ කෘති වැළඳගත් අයුරින් ඒ මිනිහාවත් වැළඳගවී කියා

මේ දවස්වල පොත් කරන එක හිතට වගේම පොකැට් එකටත් ලාබයක් තියෙනවාද ?

මේ දවස්වල පොත් කරන එක විතරක් නෙමේ හැම දේම අවිනිශ්චිතයි .මම පුංචි ව්‍යාපාරයක් කරන කෙනෙක්. ඒ සියළු දේ මේ අර්බුදකාරි වාතාවරණය අපට අහිමි කරල තියෙනවා. ඒ අපි කරපු වරදක් නිසා නොවෙයි. ඉතිං පොතක් එළි දක්වල මහා ලාභයක් නෙමේ පුංචිම සතුටක් ලබන එක විතරයි හිමි වෙන්නෙ. මම හිතන්නෙ ලේඛකයා මෙන්ම ප්‍රකාශකයාත්,පාඨකයාත් හරිම අසරණයි.

ඉතිං කියන්න ඒ මිනිහගෙන් පස්සේ මොකද වෙන්නේ

ඒ මිනිහාගෙන් පස්සෙ ලබන වසරේ මුල් කාර්තුවේ “මනුසඳ සැරිය ” නමින් මා ලියූ ලේඛක වතගොත කෘතිය එළිදක්වන්න නියමිතයි. ඒ නව වසරේම නවකතාවක් එළිදක්වන්නත් බලාපොරොත්තුවෙන් ඉන්නවා. ඒක හවුල් නවකතාවක්. මමත් සමඟ තවත් ලේඛකයෙක් එකතුවෙලා ඒ නවකතාව රචනා කරන්නෙ..

සංවාද සටහන – තුසිත පතිරණ –

Leave a Reply

Your email address will not be published. Required fields are marked *